Мæскуы æмæ æгас Уæрæсейы Патриарх

КИРИЛЛЫ

КУАДЗӔНЫ АРФÆЙЫ ФЫСТÆГ

алчертæ, сауджынтæ, диакъонтӕ, моладзантæ

æмæ Уырыссаг Чырыстон Аргъуаны æппæт иузæрдион хъæбултæм

Кӕсут-ма, куыд тынг нæ уарзы Фыд!

Хуыцауы хъæбултæ хуыйнæм мах!

(1Ин 3:1)

Рухсгонд алчертæ,

фæрныг сауджынтæ æмæ диакъонтæ,

Хуыцаууарзæг моладзантæ,

зынаргъ æфсымæртæ æмæ хотæ!

ЧЫРЫСТИ РАЙГАС!

Цинӕй йемыдзаг ӕмӕ царддӕттӕг салам ӕрвитын сымахæн, мӕ зынаргъ хъӕбултӕ, ӕмӕ уын арфӕ кӕнын Куадзӕны стыр ӕмӕ ирвӕзынгӕнӕн боны фӕдыл.

Куадзӕны бӕрӕгбон Аргъуан, дунейы ахуыргӕнджытӕй иу, Хуыцаузонӕг Григорийы загъдау, хоны бӕрӕгбонты бӕрӕгбон ӕмӕ цинты цин. Ацы ныхӕстæн фарнӕфтауӕг у сæ апп, уымӕн ӕмӕ, «хур стъалытӕй цас бӕрзонддӕр у, уыйбӕрц бӕрзонддӕр у Куадзӕн, адӕм кӕй бæрæг кӕнынц, канд алы уыцы циндзинадæй нӕ, фӕлӕ суанг, Чырыстийы номыл ӕмӕ Чырыстийӕн кӕй кӕнӕм, æппæт уыдонӕй дӕр» (45-м Ныхас Куадзӕны стыр боны). Нӕ Хицау Йесо Чырыстийы алӕмӕты Райгас у адӕмы мыггаджы ирвӕзын кӕныны историйы сӕйрагдӕр цау, не ’ууӕнчы мидис ӕмӕ фидар уидаг, чырыстон Фарны уацы астӕумагъз ӕмӕ ӕнӕбасӕтгӕ тых. Ацы бонты нӕ уацмынд райрæзы дыууӕ цыбыр дзырдӕй. «Чырысти райгас! – ацы ныхӕстӕм ма цы хъуамӕ бафтауон? Ӕппӕтдӕр загъд у!» – загъта йæ Куадзæны Ныхасы 1926 азы 18 апрелы стыр бон Мӕскуыйы митрополит Рухсӕфтауӕг Филарет.

Фыццаг адӕймаг Адам тӕригъӕды куы бацыд, уӕдӕй фӕстӕмӕ адӕмы мыггаджы цард фестад хорз ӕмӕ фыдӕхы ӕнӕрлӕугӕ быцӕу. Се Сфӕлдисӕджы фӕндоныл сӕхи атигъ кӕнгӕйӕ, адӕм сӕхи цардмӕ дæр ӕмӕ ӕгас сфӕлдыст дунемӕ дӕр ӕрбауагътой тӕригъӕд ӕмӕ уыимӕ иумӕ — фыдӕбон, низтӕ, ӕмбийыны ӕндӕрг ӕмӕ мӕлӕт. Иуыл стырдӕр бӕллӕх та у уый у, æмæ тӕригъӕд адӕмы кӕй фӕхицӕн кодта Хуыцауӕй. Иппӕрд та уымӕн фестӕм, ӕмӕ Хуыцау фыдӕх не сфӕлдыста, Хуыцауæн иудзинадӕй ницы ис тӕригъӕд ӕмӕ хӕрамимӕ. Иу рӕстаг адӕймагӕн дӕр йӕ бон нӕ уыд ацы додойаг дихдзинад, ацы ӕгӕрон дӕлджинӕг аиуварс кӕнын, уымӕн ӕмӕ ӕрмӕст адӕймаджы тыхтӕй нӕй уый саразӕн. Рухсӕфтауӕг ӕмӕ Хуыцаузонӕг Григори уымæн зӕгъы, «цӕмӕй мах райгас уӕм, уый тыххӕй нӕ бахъуыд буардзыд суӕвӕг ӕмӕ мӕлӕт бавзарӕг Хуыцау», зæгъгæ (45-м Ныхас Куадзӕны стыр бон).

Чырыстийы Райгас сси, адӕймаджы ӕнӕбондзинадыл кӕй фӕрцы фӕуӕлахиз стӕм ӕмӕ Хуыцауимӕ баиуы бӕллиц кӕй фӕрцы сӕххӕст, ӕнусон цардмӕ ахӕм абырст. Куадзӕн у, Сфӕлдисӕг адӕмы цы ӕгӕрон уарзтӕй уарзы, уый æвдисæг циндзинад, «уымӕн ӕмӕ Хуыцау афтӕ бауарзта дуне, ӕмӕ радта Йӕ Иунӕг Фырты, цӕмӕй ма фесæфа, чидӕриддӕр Ыл ӕууӕнды, уый, фӕлӕ йын уа мыггагмӕйы цард» (Ин 3:16).

Фӕлӕ Куадзӕны бӕрӕгбон рис ӕмӕ хъизӕмӕрттӕ, хӕст ӕмӕ быцӕутӕ, ӕнӕуынондзинад ӕмӕ фыдӕхӕй йемыдзаг дунейы кӕй кӕнӕм, уый цы нысан кӕны? Цы нысан кӕны нӕ зард дӕр, «мӕлӕтӕй мӕлӕт ныссӕста ӕмӕ ингӕны уӕвджытӕн цард балӕвар кодта», зæгъгæ, кӕд ӕмӕ нӕ алкӕй цард дӕр ӕнӕмӕнг фæвæййы мӕлӕтӕй? Бӕгуыдӕр, Куадзӕн нӕ аиуварс кӕны мӕлӕты къух нӕ дун-дунейæ, фӕлӕ Куадзӕны фӕрцы адӕймаджы рис ӕмӕ зӕххон царды трагедийыл мах, Мӕрдтӕй Растӕг Хицау Йесойы ахуыргӕнинӕгтӕ ӕмӕ фӕдонтӕ, уӕлахиз кӕнӕм, ӕнусон царды ныфсӕй нӕ чи схайджын кодта, Уымæн Йӕ уыцы диссаджы Райгасы фӕрцы. Ӕмӕ ныр махӕн, чырыстӕттӕн, мӕлӕт ӕцӕг дунейӕ иртӕсӕн нал у, фӕлӕ нын у цины фембӕлд ӕмӕ, ӕнхъӕлмӕ кӕмӕ кастыстӕм, Хуыцауимӕ уыцы баиуы фӕрӕз.

Чырысти, «чи амарди, уыдонӕй фыццаг» (1 Кор 15:20), махӕн бацамыдта, тӕригъӕд ӕмӕ мӕлӕтыл фӕуӕлахизмӕ чи кӕны, уыцы иунӕг фӕндаг, уарзты фӕндаг. Уыцы уарзтæн ӕвдисӕн мах хъуамӕ уӕм ӕгас дунейы раз. Ӕмӕ ӕвдисӕн та кӕнӕм фыццаджыдӕр нӕ цардӕй, уымӕн ӕмӕ, мах Ирвӕзынгӕнӕджы ахуыргӕнинӕгтӕ кæй стӕм, уый алчидӕр зондзӕн, кӕрӕдзи куы уарзӕм, уæд (Ин 13:35).

Уарзт, апостол Павелы ныхасмӕ гӕсгӕ, у, алцӕмӕй дӕр ӕххӕстгӕнӕг рахонæн кӕй ис (Кол 3:14), уыцы иууыл бӕрзонддӕр ӕмӕ иууыл стырдӕр чырыстон миниуӕг. Мах ӕнусон цардмӕ куы аивгъуыйӕм ӕмӕ Дунедарӕджы феныны аккаг куы суӕм, уӕд не ’ууӕнк фӕивдзӕн ӕмӕ суыдзӕн ӕнӕгуырысхо зонындзинад, нӕ фервӕзыны ныфс дӕр сӕххӕст уыдзӕн Хуыцауы фӕрцы. Нæ фæивдзæн никуы æрмӕстдæр уарзт ӕмӕ йын никуы уыдзӕни кӕрон ( 1 Кор 13:8).

Чырыстон дины идеал арæзтæуы адæмы ӕххӕст уарзтӕй уарзынæй, зӕгъы Рухсӕфтауӕг Игнатий (Брянчанинов) (Аскетические опыты. О любви к ближнему). Цы нысан кӕны «ӕххӕст уарзт»? Уый у, суанг ма ӕнӕзонгӕ адӕмыл, стæй, фыд зӕрдӕ нӕм чи дары ӕмӕ нын знаг чи у, уыдоныл дӕр чи ӕххӕccы, ахӕм уарзт. Уый у, адӕймаджы зонд кæй нæ ахсы, нӕ ӕрвылбонон цардӕмбарынады ӕууӕлты чи нӕ цӕуы, ахӕм удуӕлдай уарзт. Ссарӕн ӕй ис уды куыст, уды сгуыхтдзинады руаджы. Ахӕм уд свӕййы Хуыцауы фарны аккаг, ахӕм сгуыхт удыхъӕдӕн Хуыцау ратты ӕнӕуынондзинадӕн — уарзтӕй, фыдӕхӕн та хорзӕхӕй дзуапп дæттыны хъару.

Раст ахӕм уарзт равдыста махӕн Чырысти, нӕ фервӕзыны сӕраппонд ӕнӕзӕгъгӕ ӕгаддзинад, дзуарыл хъизӕмӕрттӕ бавзаргæйæ ӕмӕ удхайраг мӕлӕт баййафгӕйӕ. Хуыцауы Фырты ӕппӕтылуӕлахизгӕнӕг ӕмӕ ӕппӕтдзаггӕнӕг уарзтӕй ныппырх сты зындоны бындуртӕ ӕмӕ адӕмы мыггагӕн та ӕппыныфӕстагмӕ байгом сты дзӕнӕты дуӕрттӕ. Царды ӕппӕт фыдӕвзарӕнты мах хъуамӕ нӕ хъуыдыйы дарӕм фыдӕхы фидӕрттӕ мӕнг агъуыст кӕй сты, сӕ тых та стыр кӕй нӕу ӕмӕ сын абарӕн дӕр кæй нӕй, йӕ ратӕдзӕн Хуыцау кӕмӕн у, уарзт ӕмӕ хорздзинады уыцы хъаруимӕ. Ма нӕ ферох уӕд, тӕригъӕд ӕмӕ ӕнӕрастдзинады ныхмӕ иууылхуыздӕр хос кӕй у не ’ргом ӕмӕ зӕрдӕбын куывд Хуыцаумӕ, уӕлдайдӕр — аргъуаны аргъуыды рӕстӕджы иумӕйагӕй кӕй хӕлар кӕнӕм, уыцы куывд; уымӕй тыхджындӕр та – Чырыстийы Буар ӕмӕ Тугӕй Евхаристийы Сусӕггады саходыны хорзӕх.

Ацы ’хсӕв, Куадзӕны стыр ӕмӕ тӕмӕнкалгӕ цин ӕнкъаргӕйӕ ӕмӕ нӕ зӕрдӕты рӕбын мӕрдтӕй рабадӕг Чырыстийы уынгӕйӕ, фехъусын кӕнӕм ирвӕзынгӕнӕг цау хион ӕмӕ ӕддагон адӕмӕн, цӕмӕй уыдон дӕр феной ӕмӕ банкъарой, зӕгъӕн кӕмӕн нӕй, Хуыцауы уыцы тӕмӕнкалгӕ уарзт ӕмӕ махимӕ иумӕ раарфӕ кӕной ӕмӕ ныттабу кӕной Фыд Хуыцау, Фырт ӕмӕ Сыгъдӕг Уды стыр ӕмӕ иууылкадджын номӕн.

Адӕймаджы зондӕн аххӕссӕн кӕуыл нӕй, Куадзӕны уыцы ирвӕзынгӕнӕг рухс нын кӕддӕриддӕр рухс кӕнӕд нӕ царды фӕндаг, амонӕг ӕмӕ нын ныфсдӕттӕг уӕд ӕмӕ нын Уӕларвон Паддзахады хай райсыны ӕмӕ бындартӕ суӕвыны хорзӕх саккаг кӕнӕд.

Цин кӕнут, мӕ зынаргъ хъӕбултӕ, уымӕн ӕмӕ

ӔЦӔГӔЙДӔР РАЙГАС НӔ ХУЫЦАУ ЧЫРЫСТИ!

+ КИРИЛЛ

МÆСКУЫ ÆМÆ ÆГАС УÆРÆСЕЙЫ ПАТРИАРХ

Мæскуы

Чырыстийы Куадзæн

2016 аз